Chistu è amuri

Comu canta l’amuri?

La granni matri lu vidiu vulari

Fici na festa pi stu nascituru,

chiamò la luna e u suli

parrò a lu munti di focu

poi, sensu di matri, priparò l’altari

e tutti quanti nni mmitò a manciari.

Comu canta l’amuri?

Comu canta l’amuri!?

Canta senza pinseri,

canta senza dinari,

canta senza parrari,

canta supra l’ali

di l’aceddi chi vidi vulari.

Canta senza liccu

e canta senza spaccu,

canta sempri letu

canta sempri  un ciatu

canta sempri a mia

l’ammuri disiatu!

Comu canta l’amuri?

Iu tu cuntu,

ma tu …

fa finta ca un ti dissi nenti

picchi l’amuri nun è ppi li to denti

azzannati e lucenti comu spati

chi vonnu sempri guerra e dispirati

chi cercanu ricchizzi all’affacciu

chi vinninu lu cori e lu viddicu

chi chiancinu piatusi si li scopri

chi ti vinninu pi fari li so propri …

Comu canta l’ammuri

è cosa antica

tu ci nascisti dintra mani e peri.

È gran fatica,

è granagghia bona,

e nasci nta lu cori nettu e chiaru

nun nasci nta lu tuiu di putiaru.